في عام 2012

خططنا لرحلتنا الصيفية و كانت لاسبانيا و المناطق الي زرناها كانت ماربيا و السكن بالتحديد في بورتو بانوس و بعدها برشلونه

بهالبوست راح اتكلم عن ماربيا و المناطق القريب الي زرناها

الطيران

كانت رحلتنا على طيران اللوفتهانزا

كويت – فرانكفورت – برشلونه – فرانكفورت – كويت

الترانزيت في فرانكفورت كان تقريبا 3 ساعات في الروحه و الرده

و داخليا استخدمنا طيران

و كانت الانسب لنا بالتوقيت و السعر

ماربيا (بورتو بانوس)

زرت اسبانيا وايد لكن اول مره اسكن في البورت

البورتو بانوس من احلى و ارقى المناطق في اسبانيا و تعتبر من اشهر مصايف مشاهير و اثرياء العالم

و فيها البورت الي راح تشوفون فيه اكبر و ارقى اليخوت و السيارات

السكن

دورت بالنت عن فنادق ماربيا و بالذات البورت الصراحه كان الاختيار صعب لان الواحد دايما يحب يوازن بين الموقع و المستوى و التكلفه

ولقيت هالفندق بنص البورت و مستواه جيد و سعره مناسب

فندق بينابولا

http://benabola.com/?gclid=CP_euoetvLwCFXGWtAodKxAAHA

يتكون من غرف و شقق فندقيه (غرفه و صاله -غرفتين – 3غرف)

أخذنا شقة عبارة عن صاله و غرفه نوم و مطبخ و حمام و بلكونه

الصاله

المطبخ و المخزن

غرفة النوم

hotel (9)

و احلى ما في الفندق الفيو من البلكونه عالبورت مباشرة

احلى مافي البورت الجو الحلو و المطاعم و التمشي و السوق

و الحين صور جولتنا بالبورت

بالنسبه للسوق راح تلقون محلات اكبر الماركات العالمية و اكيد من اكبر فروع المجمع الشهير باسبانيا الكورت انجليس تحصلون فيه كل شي تقريبا

و يمه ساحه كبيره فيها العاب لليهال و مطاعم عالميه و عربيه

و من اكبر المجمعات في ماربيا اهو مجمع La Canada shopping center

تلقونه على الطريج بين بورتو بانوس و ماربيا

للاسف لما زرناه كان ويكند و اغلب المحلات مسكره لكن عالاقل طلعت بخوش صوره  و احنا طالعين من المواقف

 

 الي يزور الجنوب الاسباني ضروري لازم يروح اكثر من منطقه مثل

جبل ميخاس – فنخرولا – ملقا – سنتر ماربيا – بني المدينه (مدينة الالعاب تيفولي)

و اكيد تحتاجون تأجرون سياره

من ناحيتي اجرت مرسيدس E Class convertible من شركه sixt  عن طريق موقعهم

http://www.sixt.com/

و كان الاستلام من مكتبهم في فندق NH hotel Alanda

للاسف ما اسعفنا الوقت نزور كل الاماكن خصوصا المناطق التاريخيه مثل غرناطه و قرطبه

ميخاس

تقدرون تشوفون التقرير بهالبوست

http://jojoworld.net/?p=1366

ملقا

زرنا ملقا بس الصراحه ماعجبتني لانها منطقه كبيره و زحمه

من اهم الاماكن فيها:

1-La Concepcion حدائق

2- Pameral de las Sorpresas واجهة بحرية

3-Plaza de la Constitucion الداون تاون

و المجمعات:

1- Muelle Uno

2-Malaga Plaza

سنتر ماربيا

يبعد سنتر ماربيا عن البورت تقريبا 8 كيلو

احلى مافيها سوقها الي عباره عن سكك و حواري قديمة و تراثيه لكن المتعب انها مو مستويه مره صاعده و مره نازله

و من المحلات الي لفتت نظري فيها محل يبيع بضايع مستعمله اما تكون غاليه او قديمه كلها استعمال شخصي منها الملابس و التحف و غيرها

يعني كل يوم تدخلون هالمحل راح تشوفون بضايع غير و اذا طلعتوا منه احتمال لما ترجعون مره ثانيه ما تحصلون الي كنتوا شايفينه

و فيها حديقه بالنص و العاب للاطفال

و تغدينا بمطعم تقليدي و طلبت الباييا اشهر اكله اسبانيه

يقال ان اسمها مأخوذ من بقيه بالعربي و المقصود فيها بقايا الطعام

و الي ظل بالصورة اهو بقايا الطبق

لكن الصراحه الاكله لذييييذه

فنخرولا

اغلب الكويتيين يعرفون هالمنطقه زين و يملكون شقق فيها

و لي ذكريات حلوه فيها و ذكريات صعبه لما كنا فيها ايام الغزو واتذكر تجمعات الكويتيين في العمارات الخضر و المسيرات الي طلعناها هناك

و بما اني وصلت اسبانيا ضروري ازورها مره ثانيه

لوس بوليشس معقل الكويتيين

هالواجهه كانت المقرر اليومي للتمشي بليل لغايه ال12 او 1

مجسم الثور الاسود اشهر من نار على علم بفنخرولا

وقت زيارتنا كانت بعد العطله الصيفيه فكان هدوء على عكس الصيف بشهر 7 و 8

الي عادةً تكون المهرجانات و الالعاب بكل مكان

هذا تقريري عن الجنوب الاسباني

و ان شاءالله قريبا تقرير برشلونه

Leave a Reply

Your email address will not be published.

Post Navigation